From instagram.com

娛壹 as1.entertainment on Instagram: "邵家臻罹患胃癌 接受紓緩性治療 楊秉基祝願早日康復： 希望邵先生可以繼續寫 有番屬於佢嘅身份分享討論 為12年「選首爛腳」向邵家臻道歉 #楊秉基 有一支紅酒，等 #邵家臻 一齊開。酒樽上寫著「選首爛腳，2012年3月24日飲咗佢。」2012年選舉年，邵家臻與好戲量楊秉基舉行棟篤笑x劇場《吹得喜:選首爛腳》，原定伊館上演，最後告吹。 楊秉基前日在社交平台撰文，為這相交29年的好朋友送上祝福，也為這件十三年前的舊事向邵先生致歉。「你一直無懼不可抗力，勇往直前，將自己放到最後，將香港放到最前。」 ︱「不如唔好搞」︱ 《選首爛腳》是好戲量第一次上伊館，也是劇團首次成為藝發局「年度資助」恒常助藝團（一年）。楊秉基在帖文提到「不可抗力」，他說：「『不可抗力』係乜嘢其實我唔係好知，但當呢四個字好形象化咁出現喺面前嘅時候，唔知點去應對…」 《選首爛腳》引起關注，有人通過一些渠道，要求楊秉基解釋回覆，楊沒覆；他們便找上楊的家人，相約『飲茶』。楊深呼吸道：「邵先生好犀利，動員好多人幫手。但嗰刻，第一次，我冇機會同佢討論呢件事。我唔知點講。有啲嘢埋到身，原來你真係唔知點講。」 「正式開賣前，我只係講， #不如唔好搞 。」停頓良久：「件事就冇再傾落去。嗰個時期覺得自己好軟弱無力。唔知點講，真係唔知點講。一直帶住愧疚面對邵先生，但呢個人從來冇停低過，諗一啲嘢做一啲嘢為香港好。我覺得自己好軟弱，好想向佢道歉…覺得好對唔住邵先生﹐否則我哋可以多啲記憶多啲故事。」紅酒如今在楊家，等待邵先生回來開酒。 ︱「佢可以舉一反三、甚至反十」︱ 上世紀九十年代，楊秉基參加救世軍屯門區戲劇發展計劃，「廿幾年前屯門好荒蕪，好似一個被遺棄嘅地方，突然間會停電停水千奇百怪嘅問題。」時維1996年，新域劇團與屯門區議會合辦戲劇訓練計劃，楊透過救世軍以「戲燄」成員身份參加，晉身最後三強，接受戲劇培訓。主辦方要求他們登記註冊成獨立劇團，再不能接受資助，但演出收入卻全歸救世軍。 沒有經費難以維持，「戲燄」決定自組劇團，自給自足，因而認識青協的邵家臻。邵對這群年輕人很感好奇，覺得他們夠膽識，一拍即合。「邵先生係社工，不時喺青年活動分享會做主持或嘉賓，我心諗，呢個人咁勁、反應咁快嘅？無論人講咩，佢都可以即時舉一反三、甚至反十﹐佢一定識好多嘢，睇好多角度，所以你講咩佢都可以即時回應，而且回應好重擊。佢畀我感覺同一般社工好唔同，佢會同你交心、分享自己。」有次楊應邀上邵家，那次邵說著說著不禁哭了，愛貓走到他身旁，像在安慰，這幕令楊秉基印象很深。 ︱關於「西九龍文娛藝術街」︱ 後來楊秉基接觸「民眾戲劇」：of the people、by the people、for the people。邵家臻非劇場人，但他常主動跟楊談戲劇，甚至想到將戲劇空間擴展到民間。 好戲量03年開始街頭演出，楊稱旺角西洋菜街為「西九龍文娛藝術街」。08年 #張超雄 轉投地區直選，邵家臻邀請楊秉基做一些演出助選，於是楊做了三場「 #隱形劇場 」：「揭露社會隱性問題，達致負負得正效果。張超雄關注嘅嘢比邊緣小眾更小眾，佢甚至關心投票站有冇照顧到所有人，包括行動不便嘅人。」引來不少傳媒報道，好戲量亦繼續在旺角行人專用區演出，未幾發生「將好戲量踢出旺角」，網民批評好戲量長期佔用公共空間叫嚷擾民，要求劇團停止。 批評之聲不絕，網上風向甚至指好戲量得到「黑白兩道」支持、批准他們在街頭表演。楊秉基向邵家臻請教，邵說，不要介意輸：「唔一定係要贏，可以輸，最緊要有大眾參與。」楊憶述：「有時要爭取討論，唔一定要贏，可以『輸』引發討論。就算我哋以後唔做街頭表演，呢件事嘅本意係，有更多空間表達、分享表演。」同年8月24日，好戲量發起街頭表演論壇，讓大家表達訴求，由阻街談到空間和權力議題。「有機會去傾，諗辦法令呢個地方變得更加好。街唔一定只係得promotion girls、行乞或開大喇叭鬥大聲。」 ︱被剝奪的身份︱ 13年，好戲量6名成員在尖沙嘴街頭表演涉阻街被捕﹐邵家臻即托律師朋友幫手。楊說：「呢個人…我一有事就會搵佢，而佢一定會出現。我覺得自己好衰仔，有事先搵佢。」最後律政司沒提出起訴。 「邵先生唔係劇場人，當時亦未係議員，但已經為民請命，用佢嘅位置幫大家處理爭議困難。周遭一定有好多聲音，但佢會繼續行。我好佩服邵先生咁有力量，收監之後又搞石牆花，其實點可能做到咁多？邵先生好似聖經裡嘅參孫，有辦法有番佢嘅力量。」 2023年底，邵家臻為《 #4拍4家族 》任映後分享嘉賓。楊秉基說：「當日佢覺得自己會出席唔到…佢好多唔同嘅身份都冇咗。我以前識佢，就係佢喺唔同嘅分享活動做嘉賓主持，但嗰次映後分享，佢已經冇咗好多身份；好多活動有佢個名嘅，最後都因為唔同原因停咗。」 那次映後分享邵談了近一小時，「『記憶會遺忘』係電影主題，佢當日都有講，大家仲記得乜嘢、遺忘咗乜嘢。嗰日佢仲記得係第一千日（47人案）。」楊沉默良久，「我同佢認識起點係聽佢做主持、聽佢講嘢，嗰次分享…佢被剝奪咗好多身份。佢帶出嘅角度可以舉一反三甚至反十，佢唔係要贏人，而係啟發大家，可唔可以諗多啲。」邵正接受紓緩性治療，楊祝福對方早日康復：「希望邵先生可以繼續寫，有番屬於佢嘅身份分享討論。有時輸、俾佢反問你幾句，大家有得著都好緊要，咁先會有進步。」 #娛壹"

1 1

1,300 likes, 7 comments - as1.entertainment on January 9, 2025: "邵家臻罹患胃癌 接受紓緩性治療 楊秉基祝願早日康復： 希望邵先生可以繼續寫 有番屬於佢嘅身份分享討論 為12年「選首爛腳」向邵家臻道歉 #楊秉基 有一支紅酒，等 #邵家臻...

#伊館 #屯門 #戲劇 #政治 #旺角 #疾病 #社會 #香港 #楊秉基 #邵家臻

22h ago